*వివాదాలను త్వరితగతిన, సామరస్యపూర్వకంగా, తక్కువ ఖర్చుతో పరిష్కరించుకునేందుకు జాతీయ లోక్ అదాలత్ మంచి వేదిక
*: మండల న్యాయ సేవా అధికార సంస్థ అధ్యక్షులు, మూడవ అదనపు జిల్లా జడ్జి ఎం. గురునాథ్
*తిరుపతి, సెప్టెంబర్ 3: ఆంధ్రప్రదేశ్ రాష్ట్ర న్యాయ సేవా అధికార సంస్థ ఆదేశాల మేరకు ఈ నెల 12వ తేదీన తిరుపతిలో జాతీయ లోక్ అదాలత్ నిర్వహించనున్నట్లు మండల న్యాయ సేవా అధికార సంస్థ అధ్యక్షులు, మూడవ అదనపు జిల్లా జడ్జి ఎం. గురునాథ్ తెలిపారు.
గురువారం ఉదయం మీడియా సమావేశం నిర్వహించి వారితో మాట్లాడుతూ, ప్రజలు తమ వివాదాలను త్వరితగతిన, సామరస్యపూర్వకంగా, తక్కువ ఖర్చుతో పరిష్కరించుకునేందుకు జాతీయ లోక్ అదాలత్ మంచి వేదిక అని పేర్కొన్నారు. పెండింగ్లో ఉన్న కేసులతో పాటు, కోర్టును ఆశ్రయించకముందే పరిష్కరించుకునే ప్రీ-లిటిగేషన్ వివాదాలను కూడా లోక్ అదాలత్ ద్వారా పరిష్కరించుకునే అవకాశం ఉందని తెలిపారు.
పరిష్కరించుకునే అవకాశం ఉన్న కేసులు
• సివిల్ కేసులు, రాజీకి అనువైన క్రిమినల్ కేసులు
• చెక్ బౌన్స్ కేసులు
• మోటారు వాహన ప్రమాద పరిహార (MVA) కేసులు
• కుటుంబ, కార్మిక వివాదాలు
• బ్యాంకు రికవరీ కేసులు
• విద్యుత్, నీటి బిల్లులకు సంబంధించిన వివాదాలు
లోక్ అదాలత్లో ఇరు పక్షాల అంగీకారంతో పరిష్కరించిన కేసులో వెలువడే అవార్డు సివిల్ కోర్టు డిక్రీతో సమానమైనదని, దానిపై సాధారణంగా అప్పీల్కు అవకాశం ఉండదని తెలిపారు. అలాగే, కోర్టు ఫీజు చెల్లించిన కేసుల్లో నిబంధనల ప్రకారం ఆ ఫీజును తిరిగి చెల్లించే అవకాశం ఉంటుందని పేర్కొన్నారు.
కావున, తిరుపతి జిల్లాలో పెండింగ్లో ఉన్న కేసుల కక్షిదారులు, అలాగే ప్రీ-లిటిగేషన్ వివాదాలు ఉన్న ప్రజలు జాతీయ లోక్ అదాలత్ అవకాశాన్ని సద్వినియోగం చేసుకుని తమ వివాదాలను సత్వరమే పరిష్కరించుకోవాలని వారు కోరారు.
జాతీయ లోక్ అదాలత్పై ప్రజల్లో విస్తృత అవగాహన కల్పించేందుకు మీడియా ప్రతినిధులు తమ వంతు సహకారం అందించాలని మండల న్యాయ సేవా అధికార సంస్థ అధ్యక్షులు, మూడవ అదనపు జిల్లా జడ్జి విజ్ఞప్తి చేశారు.