చెన్నై స్టాన్లీ ఆస్పత్రిలో చికిత్స పొందుతూ 9వ తరగతి విద్యార్థి కార్తి కేయన్ మృతి
శోకసంద్రంలో కస్తూరినాయుడుకండ్రిగ.. గ్రామంలో జ్వరాలపై ఆందోళన
నాగలాపురం సెప్టెంబర్ 19 గరుడధాత్రి:
జ్వరాల తీవ్రతతో చికిత్స పొందుతున్న 9వ తరగతి విద్యార్థి మృతి చెందడంతో నాగలాపురం మండలం సురుటుపల్లి గ్రామపంచాయతీ పరిధిలోని కస్తూరినాయుడుకండ్రిగ గ్రామంలో విషాదఛాయలు అలుముకున్నాయి. గ్రామంలో గత పది రోజులుగా జ్వరాలు విజృంభిస్తుండగా పలువురు చిన్నారులు, పెద్దలు జ్వరాల బారిన పడిన విషయం తెలిసిందే. ఈ క్రమంలో తీవ్ర జ్వరంతో వారం రోజులుగా చెన్నైలోని స్టాన్లీ ప్రభుత్వ ఆస్పత్రిలో చికిత్స పొందుతున్న అదే గ్రామానికి చెందిన కార్తికేయన్ (13) శుక్రవారం అర్ధరాత్రి మృతి చెందాడు.
కుమారుడిని కాపాడుకునేందుకు చేసిన ప్రయత్నాలు ఫలించక..
నిరుపేద కుటుంబానికి చెందిన కార్తికేయన్ మృతి ఆ కుటుంబాన్ని తీవ్ర విషాదంలోకి నెట్టింది. కుమారుడికి తీవ్ర జ్వరం రావడంతో తల్లిదండ్రులు రవి, జయ దంపతులు తమకు చేతనైనంత మేర వైద్యం అందిస్తూ ఎలాగైనా కుమారుడిని కాపాడుకోవాలని ప్రయత్నించారు. పరిస్థితి విషమించడంతో చెన్నై స్టాన్లీ ఆస్పత్రికి తరలించి చికిత్స అందించినప్పటికీ ఫలితం లేకపోవడంతో కన్నీరుమున్నీరుగా విలపించారు. చదువుకుంటూ భవిష్యత్తుపై ఎన్నో ఆశలు పెట్టుకున్న కుమారుడు ఇక లేడన్న నిజాన్ని జీర్ణించుకోలేక తల్లిదండ్రులు, కుటుంబ సభ్యులు విలపించిన తీరు గ్రామస్తులను కలచివేసింది.
జ్వరాలపై అప్రమత్తత అవసరం
గ్రామంలో వరుసగా జ్వరాలు నమోదవుతుండటంతో ప్రజలు ఆందోళన చెందుతున్నారు. ముఖ్యంగా చిన్నారుల్లో జ్వరం, నీరసం, తలనొప్పి, వాంతులు, ఆకలి తగ్గడం వంటి లక్షణాలు కనిపిస్తే నిర్లక్ష్యం చేయకుండా వెంటనే వైద్యులను సంప్రదించాలని వైద్య నిపుణులు సూచిస్తున్నారు. పిల్లలకు సరిపడా ద్రవపదార్థాలు అందించడం, పరిసరాలను పరిశుభ్రంగా ఉంచడం, చేతులను తరచూ సబ్బుతో శుభ్రం చేసుకోవడం, దోమలు పెరగకుండా జాగ్రత్తలు తీసుకోవడం వంటి చర్యలు చేపట్టాలి. వైద్యుల సలహా లేకుండా మందులు, ముఖ్యంగా యాంటీబయాటిక్స్ వాడకూడదని సూచిస్తున్నారు.
గ్రామంలో ప్రత్యేక వైద్య శిబిరాలు ఏర్పాటు చేయాలి
ఒకే గ్రామంలో పలువురు జ్వరాల బారిన పడుతున్న నేపథ్యంలో సంబంధిత వైద్య, ఆరోగ్యశాఖ అధికారులు వెంటనే స్పందించాల్సిన అవసరం ఉంది. గ్రామంలో ఇంటింటి సర్వే నిర్వహించి జ్వరపీడితుల వివరాలను సేకరించడంతో పాటు రక్త నమూనాలు సేకరించి అవసరమైన పరీక్షలు నిర్వహించాలి. పరిస్థితిని బట్టి ప్రత్యేక వైద్య శిబిరాలు ఏర్పాటు చేసి ప్రజలకు అందుబాటులో వైద్య సేవలు కల్పించాలి. తాగునీటి వనరులను పరిశీలించడం, పారిశుద్ధ్య చర్యలు చేపట్టడం, నిల్వ నీటిని తొలగించడం, దోమల నియంత్రణ చర్యలు ముమ్మరం చేయడం వంటి చర్యలు చేపట్టాలని గ్రామస్తులు కోరుతున్నారు.
మరో కుటుంబంలో ఇలాంటి విషాదం చోటుచేసుకోకుండా..
ఒక చిన్నారి మృతి ఆ కుటుంబానికే కాదు.. గ్రామం మొత్తానికీ తీరని లోటు. జ్వరాల వ్యాప్తికి కారణాలను అధికారులు క్షేత్రస్థాయిలో గుర్తించి, ముందస్తు నివారణ చర్యలు చేపట్టాలని ప్రజలు కోరుతున్నారు. ముఖ్యంగా చిన్నారుల ఆరోగ్యంపై ప్రత్యేక దృష్టి సారించి పాఠశాలల్లోనూ అవగాహన కార్యక్రమాలు నిర్వహించాలి. జ్వరాల లక్షణాలు కనిపించిన వెంటనే వైద్య సేవలు అందేలా చర్యలు తీసుకోవడంతో పాటు అత్యవసర పరిస్థితుల్లో మెరుగైన ఆస్పత్రులకు త్వరితగతిన తరలించే విధంగా వైద్య సిబ్బందిని అప్రమత్తం చేయాల్సిన అవసరం ఉంది. ఇకపై ఇలాంటి విషాదకర ఘటనలు పునరావృతం కాకుండా అధికారులు ముందస్తు చర్యలకు ప్రాధాన్యం ఇవ్వాలని గ్రామస్తులు విజ్ఞప్తి చేస్తున్నారు.