మారిన లెక్కలు: విజయ్ వైపు అన్నాడీఎంకే మొగ్గు.. తమిళ రాజకీయాల్లో చక్రం తిప్పుతున్న ఈపీఎస్!
తమిళనాడు రాజకీయ పీఠంపై సందిగ్ధత కొనసాగుతోంది. అతిపెద్ద పార్టీగా అవతరించిన ‘తమిళగ వెట్రి కళగం’ (TVK) అధినేత విజయ్ ముఖ్యమంత్రిగా బాధ్యతలు చేపట్టేందుకు సిద్ధమవుతుండగా.. తెరవెనుక అనూహ్య సమీకరణాలు మారుతున్నాయి. తాజాగా అన్నాడీఎంకే (AIADMK) పార్టీ విజయ్కు బయటి నుంచి మద్దతు ఇచ్చే అవకాశం ఉందన్న వార్తలు చెన్నై రాజకీయాల్లో ప్రకంపనలు సృష్టిస్తున్నాయి.తమిళనాడు అసెంబ్లీలో మేజిక్ ఫిగర్ 118. ఎన్నికల్లో టీవీకే 108 స్థానాలు గెలుచుకోగా, విజయ్ రెండు చోట్ల విజయం సాధించడంతో ఒక సీటు వదులుకోవాల్సి ఉంటుంది. దీనివల్ల టీవీకే బలం 107కి తగ్గుతుంది. ప్రభుత్వాన్ని నిలబెట్టుకోవాలంటే కనీసం మరో 11 నుంచి 12 మంది ఎమ్మెల్యేల మద్దతు విజయ్కు అత్యవసరం.ఇప్పటికే కాంగ్రెస్ (5 సీట్లు), పీఎంకే (4 సీట్లు) విజయ్కు మద్దతు ఇచ్చేందుకు సుముఖంగా ఉన్నట్లు వార్తలు వస్తున్నాయి. రాహుల్ గాంధీ స్వయంగా విజయ్కు ఫోన్ చేయడం ఈ వాదనకు బలాన్నిస్తోంది. అయితే, చిన్న పార్టీల మద్దతు తీసుకుంటే భవిష్యత్తులో మంత్రి పదవుల కోసం ఒత్తిడి వచ్చే అవకాశం ఉంటుంది. దీనికి భిన్నంగా అన్నాడీఎంకే వంటి ప్రధాన పార్టీ బయటి నుంచి మద్దతు ఇస్తే, విజయ్ ప్రభుత్వం మరింత పటిష్ఠంగా మారుతుందని విశ్లేషకులు భావిస్తున్నారు.ఈ నేపథ్యంలో బుధవారం చెన్నైలో అన్నాడీఎంకే ఎమ్మెల్యేలు సమావేశం కానున్నారు. విజయ్ పార్టీకి మద్దతు ఇవ్వాలా? లేదా? అనే అంశంపై ఎడప్పాడి పళనిస్వామి (EPS) కీలక నిర్ణయం తీసుకునే అవకాశం ఉంది. అన్నాడీఎంకే మద్దతు ఇస్తే తమిళనాడులో డీఎంకే (DMK) రాజకీయంగా మరింత ఇబ్బందుల్లో పడే అవకాశం ఉంది.